最近有同事突然問我:「喂!聽講你出書喎!」
我個心即刻寒咗一寒，好淆底咁講:「咩呀?出咩書呀?」
佢好肯定咁講:「我聽阿邊個邊個話識你喎!仲話你出過書喎!今年又出喎!」
我嗰陣心諗個世界係咪真係細成咁，為免佢太大聲咁問而比其他人聽到，最後我收咗皮，死死氣咁向佢認咗我係「孔明」，同時叫佢唔好同人講!因為我真係唔想比人知。
自此，我估佢應該好後悔知道我係「孔明」，因為我成日捉佢聽我講故仔，每次都會話:「喂!講過故仔比你聽丫!」攪到佢反應好似:「又嚟?你有冇咁多故呀!」
仲叫佢即刻去書局買返本新書《生存故》，再追問佢睇完有咩感覺，佢就話一路睇一路驚!但真係唔錯!嗰刻聽完個人好開心，之後我就叫佢睇埋《宅女》，佢就話書局賣哂，我就借比佢睇。
今日問佢:「睇完個故仔未?」
佢:「睇咗一半咋!」
我:「咁覺得點?」
佢笑說:「個劉啟明根本就係你黎!語氣對話全部同你一樣!我一路睇一路笑!」
最後我笑而不語，期待佢睇完之後有咩感覺。
有啲明白父母生咗BB之後，會係咁Sell比人睇:「喂!我個囡呀!得唔得意呀?你覺得點呀?靚唔靚呀?」
正如我出咗書，都會問身邊嘅人:「喂!本書睇完覺得點呀?有咩感覺呀?好唔好睇呀?」
其實都幾有滿足感。
Search